عمار يا مصر(ما هى أم الدنيا برضو)

[karmen]

وزير التنمية الإدارية بيقول ان تقديم الخدمات الحكومية عن طريق الانترنت هايقلل من الفساد بين الموظفين، بس يا خوفي الموضوع يرسى في الآخر على تطوير الفساد نفسه ، ونشوف طلب الرشوة بالايميل وسدادها بالفيزا كارد .. وعجبي

التحرش الجنسى فى حفلات المطربين بقى موضة اليومين دول، ومابقتش حفلة تعدي من غير حالات تحرش جماعي، واخرها حفلات التحرش .. قصدي الحفلات الفنية بتاعة مروى وتامر وحكيم، وقريب هايبقى اكتر بند بيختلف عليه متعهد الحفلات والفنان .. المتحرشين عليك ولا عليا

أسئلة بريئة .. ليه التلوث محاوطنا في كل حتة رغم ان رئيس الحكومة اسمه نظيف، وليه الغم راكبنا رغم ان رئيس مجلس الشعب اسمه سرور؟ ‎وليه التعليم في الجامعات في الأرض رغم ان وزير التعليم العالي اسمه هلال؟ لو عرفت الإجابة اتصل بالحزب الوطني لتفوز بجائزة قيمة .. سيخ ماركة حديد عز

عاوزين تعرفوا قيمة المثقفين في بلدنا، اسمعوا دي .. رقاصة شهيرة - بتمثل دلوقتي - قابلت الأديب العالمي الراحل نجيب محفوظ وهي سايقة عربيتها الفاخرة وهو راكب عربية متواضعة جدا، فقالتله: بص الأدب عمل فيك ايه ! فرد عليها بسرعة بديهة: بصي قلة الأدب عملت فيكي ايه

بجد حاجة جميلة الإعلان عن مشروع قومى لمكافحة فيروس سى في مصر بالتعاون مع أوروبا، و يا رب نقضي على المرض اللعين ده من بلدنا، لكن اللي مش مفهوم إن اللي بيعلن عن المشروع هو وزير التعليم العالي، .. خير .. هو وزير الصحة تعبان واللا حاجه؟؟!

وزارة الداخلية مشكورة عاملة على موقعها على النت صفحة لتلقي شكاوى المواطنين والاجانب، لكن الغريب ان الجزء بتاع الاجانب بس هو اللي شغال والجزء بتاع المواطنين عطلان، فهل هما فاكرين ان ماعندناش شكاوي، ولا المقصود اننا ننسى انهم يسمعونا؟

وزير التعليم كان فرحان قوي وهو بيعلن ان معظم أوائل الثانوية العامة من المدارس الحكومية، بس الحقيقة الوزير طلع شكل وحش قوي لما كل الأوائل تقريباً أعلنوا أنهم كانوا بياخدوا دروس خصوصية وفي كل المواد .. يا ريت لما نحب نضحك ع الناس نتعب شوية وندور على حاجة مش مفقوسة.

اشمعنى موضوع توزيع الاسهم المجانية ده ما ظهرش وقت بيع الهبر الكبيرة ، ولا هي الشركات اللي مش عارفين يبعوها يلبسوها للشعب، وطبعا الناس غلابة وهاتبيع نصيبها برخص التراب، ويبقى نصيب المواطن في البلد ما يجيبش موبايل جديد ولا حتى موتوسيكل صينى

العدوان الإسرائيلي على غزة مستمر من 20 يوم ولسه قادتنا العرب - ربنا يخليهم - مش عارفين يتفقوا على القمة اللي هي اصلا مش هاتقدم ولا تأخر، نعمل قمة في الكويت يوم الاثنين ، لأ لأ نعملها في الدوحة يوم الجمعة ، لأ لأ نعمل قمة خليجية في الرياض يوم الخميس ، صباح الغيبوبة

بعد ما اتضرب بوش بالحذاء قال عم صبحي ماسح الاحذية علي مقهي بوسط البلد بالقاهرة: والله انا خايف الامريكان يقرروا ان تمشي الشعوب العربية حافية خشية تكرار الامر مع روساء وطغاة آخرين وساعتها هضيع انا في الرجلين


يقال ان العيد القومي للشرطة في مصر سيتم تغييره من 25 يناير من كل عام إلى 26 نوفمبر وهي ذكرى انتصار رجال الشرطة على الشياطين الحمر في موقعة الجبل الاخضر كما سيتم تغيير شعار الداخلية إلى( الشرطة في خدمة الاهلي)

التليفزيون المصري اشترى المسلسل التركي مهند ونور بعد ما الدنيا كلها شافته وحفظته بخمسة مليون جنيه مش كان الاحسن يدفعوا المبلغ ده في تطوير البرامج ولا تدريب المذيعين بدل اعلام الريادة اللي كاسفنا في كل حتة ده

لما الاسعار العالمية ارتفعت، التجار كانوا بيرفعوا اسعار السلع يوم بيوم، والحكومة كانت بتقول حقهم اصل دي اسعار عالمية والسوق عرض وطلب، لكن دلوقتي لما الاسعار (العالمية برضه) نزلت، والقمح بقى بربع تمنه والبترول بقى بتلت تمنه، مفيش حاجة سعرها نزل في مصر،( والتجار والحكومة عملوا مش من هنا)

بسبب سيل الإعلانات اللي بتروج للمنتجعات والقرى السياحية اصبح الجيل الجديد من الاطفال يعتقدون ان الهيلكوبتر والتليفريك هما وسيلة المواصلات اللي بيستعملها عامة الشعب وان اللعبة الشعبية الأولى فى مصر الأن هى الجولف

الدكتور سرور افتتح ملعب اسكواش في السيدة زينب .. أظن كده هانت ومش فاضل للحكومة غير حاجات بسيطة وتحل مشاكل العشوائيات في القاهرة، يدوبك صالة بولينج في اسطبل عنتر وملعب جولف 18 حفرة في حكر ابو دومة

وزارة الكهرباء تدعو المواطنين لترشيد استهلاك الكهرباء وشراء لمبات موفرة للطاقة.. طيب ما توفروا على المواطن فاتورة النظافة الاول اللي بيدفعها وبرضه بيشيل الزبالة بنفسه .. ولا هو الباشا صاحب مصنع اللمبات مش عارف يسوق انتاجه في مصر؟

المفروض نحتفل كلنا باليوم القومي لتقديم الساعة في التوقيت الصيفي علشان باين كده ان هي دى الحاجة الوحيدة اللي بتتقدم في مصر

كلنا قولنا ان قرار ذبح الخنازير ده ممتاز، لكن وقت الجد لقينا الحكومة بتدبح 300 خنزير بس كل يوم، يعني محتاجة اكتر من 3 سنين عشان تخلص جميع الخنازير اللي في مصر .. هي الحكومة بتشتغلنا ولا ايه النظام؟

اهى البعزقة دى اللى جايبلنا الديون والمشاكل، 500 أهيف مرتب الطبيب البيطري حتة واحدة، و لايمكن الخبر غلط و الـ 500 جنيه دول مرتب.
الـ 1500 طبيب كلهم، آه تبقى معقولة، 30 قرش فى الشهر كويسين، بدل ما ينحرفوا و يشربوا سجاير ويلعبوا قمار

أعضاء مجلس الشورى بيطلبوا من الرئيس مبارك انه يقيل حكومة نظيف، والله لو حصلت لنغنلكوا (والله وعملوها الرجالة)

[radwan]

اللهم احفظنا

[EzAt99]

مصر بتتقدم بينا

[Silver]

دى ولا نشرة الخامسة والعشرون

ولا حتى نشرة هيمة

مفيش تعليق

تسلمى

[karmen]

المفروض نحتفل كلنا باليوم القومي لتقديم الساعة في التوقيت الصيفي علشان باين كده ان هي دى الحاجة الوحيدة اللي بتتقدم في مصر

ما قلنا يا ميدو هى دى الحاجه الوحيده اللى بتتقدم فى مصر
هههههههههه
ميرسى عالمرور

[karmen]

ميرسى رضوان ورامى عالمرور

[mody eljoker]

شكرا على الموضوع الرائع ده وبقول مرة تانية نصيحة منى ابعدى عن السكة دى

[karmen]

هههههههههههههههه
حاضر يا مودى بدل ما نروح بلاد الواك واك عندك حق