|
فتحت شباكي لشمس الصباح ما دخلش منه غير عويل الرياح و فتحت قلبي عشان أبوح بالألم ما خرجش منه غير محبه وسماح عجبي !! ::::::::::::::::::::: غمست سنك في السواد يا قلم عشان ما تكتب شعر يقطر ألم مالك جرالك إيه يا مجنون..و ليه رسمت ورده وبيت و قلب و علم عجبي !! ::::::::::::::::: أنا الذي عُمري إشتياق في إشتياق و قطر داخل في محطة الفراق قصدت نبع السم وشربت سم من كتر شوقي وعشمي في الترياق عجبي !! :::::::::::::::: أنا الذي عشت الزمن مضيعه بروح حزينه معفنه مضعضعه زرعت شجرة سنط لجل أنجرح لقيتها شعر البنت ومفرعه عجبي !! :::::::::::::::: لو فيه سلام في الأرض وطمان وأمن لو كان مفيش ولا فقر ولا خوف وجبن لو يملك الإنسان مصير كل شئ أنا كنت أجيب للدنيا ميت ألف إبن عجبي !! :::::::::::::::: العشب طاطا للنسايم و نخ أخضر طري مالهش في الحسن أخ عصفور عبيط أنا..غاوي بهجه وغُنا هنزل هنا..وإنشالله يهبرني فخ عجبي !! ::::::::::::::: |
أوصيك يابني بالقمر والزهور أوصيك بليل القاهره المسحور و إن جيت في بالك.إشتري عقد فُلّ لأي سمرا..وقبري إوعَك تزور عجبي !! :::::::::::::::::: غمض عينيك وإرقص بخفه ودلع الدنيا هي الشابه و إنت الجدع تشوف رشاقة خطوتك تعبدك لكن إنت لو بصيت لرجليك.تـقع عجبي !! ::::::::::::::::: حاسب من الأحزان و حاسب لها حاسب على رقابيك من حبلها راح تنتهي ولابد راح تنتهي مش إنتهت أحزان من قبلها؟ عجبي !! :::::::::::::::::: يأسك و صبرك بين إيديك وإنت حُر تيأس ما تيأس الحياه راح تِمُر أنا دُقت من دا ومن دا عجبي لقيت الصبر مُر و برضَك اليأس مُر عجبي !! ::::::::::::::: ولدي نصحتك لمّا صوتي إتنبح ما تخافش من جني ولا من شبح و إن هَبّ فيك عفريت قتيل إسأله ما دافِعش ليه عن نفسه يوم ما إندبح عجبي !! :::::::::::::::: ولدي إليك بدل البالون ميت بالون إنفخ وطرقع فيه على كل لون عساك تشوف بعينك مصيرالرجال المنفوخين في الستره و البنطلون عجبي !! ::::::::::::::: خوض معركتها زي جدك ما خاض صالب و قالب شفتك بإمتعاض هي كده..ما تنولش منها الأمل غير بعض صد ورد ووجاع مخاض عجبي !! :::::::::::::::: |
كام إشتغلت يا نيل في نحت الصخور مليون بئونه و ألف مليون هاتور يا نيل أنا إبن حلال ومن خلفتك و ليه صعيبه علي بس الأمور عجبي !!! |
منين أجيبها كلمه متألمه لعيبه فايره حايره ومُصممه منين أجيبها كلمه تكون بنت أرض تشفي اللي ما شافهوش كلام السمـا عجبي !!! |
أنا اللي بالأمر المُحال إغتوي شُفت القمر نطيت لفوق في الهوا طُلته ما طُلتوش إيه أنا يهمني و ليه..ما دام بالنشوه قلبي إرتوي عجبي !! |
بره الإزاز كان غيم وأمطار وبرق ما يهمنيش–أنا قلت–ولا عندي فرق غيرت رأيي بعد ساعة زمن وكنت في الشارع..وفي الجزمه خرق عجبي !!! |
عيني رأت مولود على كتف أُمُه يصرخ تهنن فيه يصرخ تضُمه يصرخ تقول يا بني ما تنطق كلام ده اللي ما يتكلمش يكتر همه عجبي !!! |
أنا قلت كلمه وكان لها معنيين كما بطن واحده و توأمين زي وشين لو دنيا شر..التوأم الخير يموت لو دنيا خير..الشرح يعيش منين عجبي !! |
يا عندليب ما تخافش من غنوتك قول شكوتك وإحكي على بلوتك الغنوه مش هتموتك إنما كتم الغُنا هو اللي هيموتك عجبي !!! |
طال إنتظاري للربيع يرجع و الجو يدفا والزهور تطلع عاد الربيع عرمرم شباب إيه اللي خلاني إبتديت أفزع ؟ عجبي !!! |
| الساعة الآن 05:41 AM. |
Powered by vBulletin® Version 3.8.12 by vBS
Copyright ©2000 - 2025, Jelsoft Enterprises Ltd.
TranZ By World 4Arab
www.q8-one.com