|
مهبوش بخربوش الألم والضياع
قلبي ومنزوع م الضلوع انتزاع يا مرايتي يا اللي بترسمي ضحكتي يا هلترى ده وش والا قناع عجبي !! |
ليه يا حبيبتي ما بيننا دايماً سفر
ده البعد ذنب كبير لا يُغتفر ليه يا حبيبتي ما بيننا دايما بحور أعدي بحر ألاقي غيره اتحفر عجبي !! |
حبيت .. لكن حب من غير حنان
وصاحبت لكن صُحبه ما لهاش أمان رحت لحكيم واكتر لقيت بلوتي إن اللي جوّه القلب مش ع اللسان عجبي !! |
- الدنيا من غير الربيع ميّته
ورقة شجر ضعفانه ومفتفته - لأ يا جدع غلطان تأمّل وشوف زهر الشتا طالع في عز الشتا عجبي !! |
يا للي انت بيتك قش مفروش بريش
تقوى عليه الريح . يصبح مفيش عجبي عليك حواليك مخالب كبار وما لكش غير منقار وقادر تعيش عجبي !! |
حقرا وفوق كوكب حقير محتقر
في الكون تكون دنياكو إيه يا بَقَر رملايه من صحرا ؟ .. لكين إيش تقول والكون بحاله جوّه عقل البشر عجبي !! |
يا للي بتبحث عن إله تعبده
بحث الغريق عن أي شيء ينجده الله جميل وعليم ورحمن رحيم إحمل صفاته ... وانت راح توجده عجبي !! |
لا تجبر الإنسان ولا تخيّره
يكفيه ما فيه من عقل بيحيّره اللي النهارده بيطلبه ويشتهيه هو اللي بكره ح يشتهي يغيّره عجبي !! |
يا للي ف حماه الشمس تلقى الملاذ
وألف بكره وبكره ... في ضلوعه لاذ مين انت ؟ مارد ؟ رب ؟ قال لأ ده بس انا اللي باروي القمح واسقي الفولاذ عجبي !! |
البط شال عدَّى الجبال والبحور
ياما نفسي اهجّ ... أحج ويا الطيور أَوصيك يا ربي لما أموت ... والنبي ما تودّنيش الجنة ... للجنة سور عجبي !! |
| الساعة الآن 09:46 PM. |
Powered by vBulletin® Version 3.8.12 by vBS
Copyright ©2000 - 2025, Jelsoft Enterprises Ltd.
TranZ By World 4Arab
www.q8-one.com