سالخير يا جدعان ..
كنت قاعد امبارح
بعد ما أخدت دش جالي خاطر والله أعلم شكله كده من تأثير البرد ..
قلت لو الفراعنه كانو لسه عايشين للنهارده كانت الحياه بقت ايه ..
تعالو نسرح سوا كده ونشوفهم ..
______________
الوزير ( مقضي-ها ) قاعد في الصباح الباكر بيقرا مجله ميكي وبياخد حمام شمس
وجمبه كوب نسكافيه معمول علي ميه بارده ..
بيدخل عليه أحد الجنود فجأه مؤدياً التحيه العسكريه ..
الوزير : ايه يابني فزعتني ع الصبح .. ؟
الجندي : يافندم جالنا إخباريه دلوقت إن العيال بتوع جامعه عين شمس عاملين مظاهره ..
الوزير : ليه تاني فيه ايه , احنا مش لسه مطلعينهم رحله اسكندريه أول امبارح .. ؟
الجندي : يافندم مجمعين نفسهم وشايلين يافطه عليها صوره الفرعون -باركه الله- وبيقولو
( الأسعار حرقت دمنا .. خفضها بقي وارحم أمنا )
الوزير : العيال دي عايزة ايه , هو علشان عملنالهم ديموقراطيه هايتنططو .. ؟
ثم ضرب آخر بقين من النسكافيه وقام رافس الشيزلونج برجله ونزل الجنينه يكلم الفرعون ( بال-طجي ) ..
الوزير : نهارك سعيد معاليك .
وقام قايل النشيد الوطني :
هشتكنا وبشتكنا يا ريس ..
دانت رئيس والنعمه كويس ..
يا مدلعنا , يا مهنينا ..
ظبطنا يا راجل يا كويس ..
وكان الفرعون نايم ع الشيزلونج بتاعه برضه , وأول ما سمع الوزير راح
رافع البرنيطه من علي وشه وبص له من تحت النضاره الشمس الـ (بوليس) اللي جابتهاله الست حرمه
في احتفاليه توليه الحكم للسنه الاتنين وستين ع التوالي ..
الفرعون : يسعد صباحك يا وزير , يااااااه الواحد لما بيقعد في الشمس كده خمس تسع ساعات كل يوم
قبل مايباشر أعماله بيحس يا أخي كأن العضمه طريت من تاني , خير يابو الوزاوير فيه ايه .. ؟
الوزير : ربنا يطري ف عضم معاليك كمان وكمان ..
وقام متنحنح فالفرعون قلق ..
الفرعون : مالك يا وزير فيه ايه .. ؟
الوزير : احم .. معاليك فيه مظاهره عند كليه طب أسنان في جامعه عين شمس ..
الفرعون : طب وايه الجديد ماهم كل يوم طالعين بمظاهره شكل .. ؟
الوزير يتنحنح كمان مره ..
الفرعون : ايه يا وزير مالك فيه ايه , انت جاي تسلك زورك جمبي ؟
الوزير يبلع ريقه ويقول
الوزير : بس معاليك دي غير كل المظاهرات ..
الفرعون : يعني ايه يعني , جايبين معاهم (سعد الصغير) في المظاهره .. ما تتكلم يا عم فيه ايه .. ؟
الوزير : احم .. معاليك دول ولامؤاخذه رافعين صورتك ع العامود وبينددو بالأسعار ..
وفجأه ينقلب وش الفرعون ويحمر ويبدأ دخان خفيف يطلع من دماغه
مع صوت غريب من مناخيره كأنه هايرجع ويقول
الفرعون : صورتي , هي حصلت يعلقوني ع العواميد .. ماشي ياولاد الـ (.....) ..
وقام رامي البرنيطه علي جنب وبان عليه علامات التفكير العميق وقال
الفرعون : مممممممم , ابعتلي حد م الحراس يجيبلي الجوزه بسرعه ..
وف ثواني الجوزه أم برطمان م الكبير تكون حاضره , ياخد نفسين ويقول
الفرعون : دبرني يا وزير ..
الوزير : نعتقلهم معاليك ..
الفرعون يرد باستنكار وهو بيطلع النفس من مناخيره
الفرعون : نعتقلهم ايه احنا هانتعابط .. مش لسه معتقلين التلاتين طالب بتوع تجاره في مظاهره امبارح ..
الناس تقول عليا ايه يعني .. ظالم .. غاوي يعتقل طلبه .. !!
أنا عندي فكره أحسن , احنا نشوف مين العيال اللي عملت كده
وننزل أساميهم في مجله الشرف بتاع الجامعه ونعمل لهم رحله بحريه علي حساب الدوله
وهما علي المركب نقوم ضاربينهم بصواريخ وبمب من الجديد اللي استوردناه من روسيا ..
هات حجر يابني بسرعه وزود النار شويه ..
ونعلن في الجرايد انهم قامت عليهم عاصفه وغرقو ف البحر ..
ونبقي خلصنا منهم , وبكده ماحدش هاينكش ف الحوار وتبقي قضاء وقدر ..
الوزير : الله علي أفكارك النيره معاليك , دايما أفكارك متجدده ..
بس فيه مشكله سعادتك , أهالي الطلبه , طبعا هانسكتهم بتعويض ..
الفرعون : ايوا ايوا , ابقي ادي لكل أسرة عشره خمستاشر ألف ..
الوزير : أيوا بس خزنه الدوله فاضيه معاليك ..
الفرعون : خلاص يا وزير خدهم من حسابي الخاص , ولما ربنا يفرجها ابقي خدهم م الخزنه وحطهم ف حسابي تاني ..
وماتنساش تحسب الفوايد طبعا ..
فيضحك الوزير بخبث ويقول
الوزير : معلوم سيادتك .. معلوم , هيهيهيهيهيهيهييييي -ضحكه صفره- ..
الفرعون : أنا عايزك تتعلم بقي يا وزير من الأفكار دي , مش كل حاجه هاعملها أنا يا أخي ..
حجر يابني بسرعه , وهات الشطرنج معاك وانت جاي ..
تعالي بقي أما أخبطك دور شطرنج يا وزير ..
وتخلص الحكايه ما بين ضحكه الوزير الصفره وانتشاء الفرعون ودخان الجوزه ..