الإعتـراف سيـد الفـانلـه .. @

[follow me]

السلامـ عليكمـ


معلش انى كنت غايب كده لفتره .. و بشكر كل اللى سألوا

امـ هنــد

عوده من جديد و قضيه اخرى مهمه و موجوده فى حياتنـا بس خدت مجال كلامـ و نقاش كبيــر فى فتره مـا عدت و مازالت



بنتكلمـ عن
التعذيب فى السجون و أقسامـ الشرطه



هل ده مسموح ... هل ده حق .. هل ده عدل
طيب كل ده تحت مسمى ايه :

الشرطه فى خدمه الشعب .. المتهمـ برىء حتى تثبت ادانته
طيب و على ما تثبت ادانته هيكون ثبت ان جراله حاجه من اللى بيجراله تحت الضغوط



لا ده فى مسمى جديـد بقوا بيتداروا وراه .. الا و هـو :

الإعتراف سيد الفانله .... اقصد طبعاّ انه سيد الأدله زى مـ بيقولوا
و عشان يا عينى يحصلوا على المعلومات لازمـ يطلعوا عين المتهمـ ده اذا مكفاش عينه يعنى


بس فى كارثه تانيه

حوارات التعذيب دى بقت موجوده بغرض التسليه .. و المرح و خفه الدمـ و تضييع الوقت بدل مـ نشوف شغلنـا .. و نشوف البلاوى اللى بتحصل
اكيد اكيد كلنا شوفنا فيديوهات بتأكد كلامى ده ..منها اللى فيه تريقه على عسكرى امن مركزى و منها اللى مشيل و احد كتب فوق دماغه و نازل فيه تلطيش على وشه






و اللى مره مكتف بنت و شغال ضرب فيهـا ولا كأن فى احترامـ لاّدميه الناس دى



مش هننكر ان فيهمـ ناس حراميه و .. و ... الــخ
بس عمرنا مـ كنا بنسمع اللى بيحصل ده .. و اللى شاف فيلمـ ( هى فوضى ) هيلاقى ان ده واقع ملموس و للأسف عايشينه




كارثه تالته

معظمـ الناس بقت خايفه تدخل اقسامـ الشرطه حتى لو عايزين يقضوا مصلحه
ده اللى بيشوف حد واقع فى طريق ولا جراله حاجه بيخاف يبلغ احسن يتهموه هو .. طيب ده جزاء الراجل انه بينقذ حياه واحد يقومـ يتاخد كده بدون اعذار و مقدمات و يعاملوه على انه هو اللى ارتكب الجريمه .. و يا سلامـ يا سلامـ لو مقالش الكلامـ اللى يوزن الدماغ و يكيف الظابط .. بتبقى ليله طنط مش معديه ( طنط امه يعنى )

طيب ده كمان فى اماكن بتبقى فى السجون و تحت الأرض .. طبعاّ طبعاّ عشان فى زوار بيحبوا يقضوا الـ WeeK EnD فى مكان ساحر .. و انا بقترح من هذا المكان ان ممكن نعمل فكره ( البرايمـ ) و المسجون اللى يفوز يبقى من نصيبه رحله مجانيه الى اعماق ما تحت الأرض



ايه اللى احنا عايشين ده .. و هل فعلاّ المسئولين ميعرفوش حاجه عن المواضيع دى

نيجى بقى لأهمـ و اكبر كارثه
حق المواطن

ياترى المواطن اللى اتبهدل من غير ذنب ده ( طبعاّ كل كلامى عن اللى بيتعذبوا من غير ذنب )
يا ترى ليه حق ياخده ولا خلاص .. عشان كلنا عارفين ان اى ظابط او معظمهمـ يعنى دخلوا الشرطه بالواسطه او (الست هانمـ واسطه) .. احسن تكون قريبتهمـ ولا حاجه
فـ اكيد اللى دخله شرطه يقدر يخرجه من اى ورطه او مشكله
ثمـ فيها ايه لما الظابط يبقى فاضى و مش لاقى حاجه يعملها و يتسلى ع الشعب شويه
طيب ده حتى فى مقوله قالها واحد مجرب ( الشعب فى خدمه مزاج الشـرطه )







مش فئه الشرطه دى من الفئات العليا اللى موجودين فى البلد و تخصصهمـ يجيبوا حقوق الناس
طيب ليه بدل مـ يجيبوا حقوق الناس بيجيبوا أجلهمـ .. كتير سمعنا عن حالات وفاه فى اقسامـ شرطه و بدون ذكر اسماْ الأقسامـ يعنى .. و سمعنا عن الظابط اللى راح لواحد فى بيته و خلى العساكر يصوروه و هو من غير هدوم خالص و هما حواليه و عمالين يضربوا فيه


ياترى فعلاّ على رأى كريمـ عبد العزيـز ( نشتكى الحكومه لربنا ) !!
اصل هنروح لمين نشتكيهمـ ؟؟؟؟




دى كمان بقت عاده زيها زى واجب الضيافه لأى ضيف جديد ليه ذنب بقى ولا ملوش المهمـ انه مش هيخرج إلا لما يشوف كرمـ و جود الظباط اللى فى شرف استقباله .. لدرجه انهمـ بيضطروا يا عينى يعترفوا بأى حاجه بس عشان يترحموا بس برضه مفيش فايده


لازمـ حد يلحقنا و بسرعه .. فى ناس ماتت و فى ناس فى المستشفيات و الضحايا كترت اوى و مش عارفين اّخر للحكايه دى






ياريت يكون كلامنا بيوصل لحد يساعدنا .. و ياريت بدل مـ نكون سبب فى تعديل من حق الناس .. منتاخدش زيهمـ عشان قولنا كلمه حق




شكـــــــــــراّ ....
و بعتذر مره تانيـه عن التأخيـر


فى انتظار الاّراء و اى نقــد للموضوع

مش منقــــول