خيـــــــرها فى غيـــــرها !!!

[يوما]

لما تمشى فى اى شارع اليومين دول بتلاقى اول حاجه تصادفك وتقابلك ... اكوام الزباله اللى مش عارفه بتيجى منين .. والمصيبه انك بتشم الريحه من على بعد اميال ومن على اول الشارع كمان المنظر ده بيتعاد كل يوم وكل دقيقه .... اكوام زباله لا حصر لها ولا عدد ....وطبعا مش هاقولكوا ان الصفايح اللى عملاها حكومتنا مليانه لا طبعا .. ده الصفايح وكمان الشارع اللى جنب الصفايح........... وكإن الناس للاسف مش شايفه هى بتحدف فين
وتحس ان السمه الاساسيه للشارع المصرى بجانب ظواهر تانيه كتير ..الزباله اللى مرميه شمال ويمين !!!!


سيبك من الكلام ده كله ... ممكن جدا المشكله ده تتحل لو حد من بتوع الحى ربنا اكرمه وحاول انه يجيب حد يلم الزباله ده



لكن المشكله الحقيقيه واللى بجد غايظانى فعلا ان احنا كنا الاول عندنا الراجل الزبال بييجى يخبط ويلم الزباله من البيوت


ولـــــكن ,,,,




طبعا حكومتنا تفكيرها اوسع واعمق من كده ... قالت لا نتطور بقى (على اساس ان مصر ناقصها تطور الزباله ) ما علينا ,,,,قالت نجيب شركه متخصصه تشيل الزباله من الشوارع ... حلو اوى جت شركه الزباله بتشيل الزباله ولما الشركه) (استهبلت )لكن ظروف معينه بطلت الشركه تقوم بعملها وتشيل الزباله اصبح عندنا ظاهره جديده وهى الاكوام الفظيعه ده من الزباله
(يلا هى جت عليه... اشمعنى ا الزباله,, لازم تعبر عن نفسها برضه)


خدوا بالكوا بقى معايا .... الحكايه اللى عملوها ده بقى اتسببت فى ايه ... اقولك ؟؟؟؟




الزبالين اللى كان شغلهم كله على شيل الزباله غيروا نشاطهم طبعا وبقوا بيشتغلوا فى الشحاته والنصب والسرقه (تغيير العتبه حلو برضه )
وطبعا الفرق فى المرتب عالى جدا وده حاجه غنيه عن التعريف ... دلوقتى لو جيت بوست رجله علشان يرجع يشيل الزباله مش هيعبرك اساسا لانه طبعا بقى من كبار المستثمرين (خد بالك من المستثمرين ده)





تعالى بقى لاخونا المطحون اكيد كلنا عارفينه ( المواطن المصرى ) اللى كل البلاوى بتقع على دماغه زودوله الزباله على الكهربا علشان يدفعوا للشركه اللى بتشيل الزباله ( وطبعا كالعاده فى ناس تانيه بيندفع لها مع الشركه ) ولما صوٌت المواطن واعترض محدش عبره كالعاده


واللى انا شفته بعينى بقى ان فى ناس علشان تخلص من الزباله ده جابوا واحد من الناس اللى لسه ماعتزلوش مهنه الزبالين (واللى لسه موصلهمش الاستثمار) علشان يشيلوا الزباله ... وطبعا بالشكل ده بقى المواطن بيدفع مرتين ...




ودلوقتى ومع ظهور انفلونزا الخنازير واللى هى بتاكل الزباله اساسا .. الحكومه ادامها حلين يااما تتصرف فى الزباله ده ياما تجيب الخنازير تاكلها ويبقى الفيرس وباء فى مصر وكده برضه يبقى فى ظاهره جديده فى مصر وهى انفلونزا الخنازير وتتحول الظاهره لوباء



وفى الحالتين احب اقولك ياحكومه::


(خـــــيرها فى غـــــيرها )